سياسة الخصوصية

مسودة — يراجعها محامي قبل الإطلاق

آخر تحديث: 24 أكتوبر 2026

باختصار

• التطبيق يشتغل كامل بدون حساب، وبياناتك تبقى في جوالك.
• ما نبيع بياناتك، وما نستخدم إعلانات تتبعك، وما نطلب معرّف الإعلانات في جوالك.
• اسم المحل اللي تكتبينه يبقى خاص فيك، وما نعرضه لأي أحد.
• تقدرين تحذفين حسابك وكل بياناتك من داخل التطبيق في أي وقت.

اللي يبقى في جوالك

قطع صندوقك (النوع، والعيار، والوزن، والسعر، والتاريخ، والصورة، والملاحظة)، وإعداداتك، وتذكيرات الزكاة. إذا ما سوّيتي حساب، ما يطلع منها شي من جوالك.

إذا سوّيتي حساب

تسجلين بأبل أو قوقل أو كود على الإيميل، عشان نحفظ صندوقك ونرجعه لك في جوال ثاني. نحفظ إيميلك ونسخة من صندوقك في Supabase على خوادم في الاتحاد الأوروبي (فرانكفورت). كل حساب يشوف بياناته بس.

اسم المحل

لو كتبتي اسم المحل اللي شريتي منه، ينحفظ بشكل خاص، وما يشوفه أي أحد غيرك، ولا ينعرض في التطبيق أو الموقع أو أي مشاركة. نستخدمه بس داخل نموذج الأسعار عندنا، عشان نحسب المصنعية المعتادة. اللي ننشره يكون على مستوى المدينة ونوع القطعة بس، ومن عدد كافي من الفواتير بحيث ما ينعرف منه أي شخص أو أي محل.

قراءة الفاتورة بالذكاء الاصطناعي (اختياري)

في غوايش بلس تقدرين تصوّرين الفاتورة أو البطاقة المعلّقة، ونقرأ منها الوزن والعيار والسعر. هذي الميزة ما تشتغل إلا إذا اخترتيها بنفسك. الصورة تنرسل لخادمنا ولمزوّد قراءة بالذكاء الاصطناعي عشان يطلع الأرقام، وبعدها ما نحتفظ بالصورة في خوادمنا إلا إذا حفظتيها في أرشيف فواتيرك. قبل ما ترسلين الصورة، تقدرين تغطّين اسمك أو رقم جوالك المكتوب عليها.

مشاركة الأسعار لتحسين «مؤشر غوايش» (اختياري)

بعد الفحص نسألك: تشاركين السعر بدون اسمك؟ إذا وافقتي، نحفظ نوع القطعة والعيار والوزن والسعر والمدينة والتاريخ، بدون اسمك أو إيميلك. تقدرين توقفين المشاركة من الإعدادات.

بيانات الاستخدام

نستخدم PostHog (خوادم في الاتحاد الأوروبي) عشان نعرف أي الشاشات تنفتح وأي الخطوات صعبة، بأسماء أحداث مثل «فحص تم». ما نرسل فيها مبالغ ولا أوزان ولا أسماء. بدون كوكيز إعلانية وبدون تتبع بين التطبيقات.

في الموقع نستخدم Cloudflare Web Analytics عشان نعرف عدد الزيارات. ما يستخدم كوكيز ولا يتتبع الأشخاص. والموقع نفسه مستضاف على Cloudflare.

قائمة الانتظار

إذا سجّلتي إيميلك في الموقع، نستخدمه بس عشان نبلغك يوم ينزل التطبيق، ونحذفه بعدها إذا طلبتي.

حذف حسابك وبياناتك

من التطبيق: الإعدادات ← الحساب ← احذفي حسابي. ينحذف حسابك ونسخة صندوقك من خوادمنا خلال 30 يوم، وبيانات جوالك تنمسح من الإعدادات ← الخصوصية. الأسعار اللي شاركتيها بدون اسم ما ترتبط فيك أصلًا. وتقدرين تكتبين لنا على privacy@ghawayesh.com.

حقوقك

حسب نظام حماية البيانات الشخصية في السعودية، لك تعرفين وش عندنا عنك، وتصححينه، وتحذفينه، وتاخذين نسخة منه. اكتبي لنا ونرد خلال 30 يوم.

الأطفال

غوايش موجّه لمن عمرهم 18 سنة وأكثر.

تواصلي معنا

الخصوصية: privacy@ghawayesh.com. ثغرة أمنية: security@ghawayesh.com.